Kisah Bamadu 6

Pamali jar urang bahari, amun kisah pina digantung gantung.

Ayuha, malam ini kita tuntungakan kisahnya.

Amun sudah tuntung, ulun minta pandapat bubuhan sampian lah. Bujur adakah kisah nang kaya ini, atawa hanya karadaw pander kah.

Kaini nah kisah sambungannya

“Ui Luh kaluar ikam. Dasar kuyang nih marabuti laki urang haja. Kadada ah lalakian nang lain”, ujarku bakuciak nyaring imbah sampai di halaman rumah Aluh Jarmah.

Kada saapa kaluar umanya Aluh matan rumah. 

“Napang ti Bar. Kada usah bakuciakkah kalu. Mun handak baurusan, bapandir pang baik-baik”, umanya Aluh manakuni aku.

Nang ngaran sudah sarik, kada tahu urang tuha ai, kutarik tangan sidin. Takajut sidin, tauntal kuluman sidin kalu.

“Mana Aluh nang maambil laki urang. Luh!Kaluar Luh, Ujarku sambil bukah manyasah ka dalam rumah.

“Aluh kadada, hanyar ha tulak ka pasar wan Suri.”

Gap! Marigap dadaku. Asa runtuh langit di atas kapalaku. Asa kadap panjanakku. Bakunang-kunang baputar di atas kapalaku. Aku kada ingat napa-apa lagi.

Imbah aku sadar, kuitihi sakulilinganku. Anakku badua manangis mamingkuti tanganku. Aku kada ba ucap napa-apa. Umaku duduk di higaku kada sing garakan. Kaya ada nang manindih awak sidin. 

“Sudah nasip ikam kalu Luh ai, nang kaya ini, kada kawa ai, basabarai”, umaku baucap sambil kikiliran banyu mata sidin. Cuba itihi anak ikam nang badua ni. Kasian inya mun kada baabah. Tarima ai. Nasip ikam bamadu….

Aku asa kada kawa baucap. Karungkungan asa ada nang mangacak. Padih sampai ka dada. Kuragap anakku nang badua. Mangis kami saparanakan.

“Umai purun banar abah ikam awan kita. Jaka kada tapandang ikam nang badua sudah kutinggalakan banua nia. Madam aku kada babulikan lagi”, jarku sambil maragap anakku.

Tamat

Doakan, mudahan awak sihat rajaki lancar insyaallah kaina kita kawa pulang bakikisahan.

Ada kisah moralnya :

1. Buruk sangka itu bahujung petaka.

2. Gurisan nasib dasar bujur bujur kada kawa baindah.

https://www.facebook.com/100043364930662/posts/575599827228843/