Buhan Hampian maguni-ai kalu ingat lawan Martinus, kakanakan urang Aceh nang salamat kada tinggalam pahian Sunami, nang imbahnya jadi anak angkat ading ulun, Cristiano Ronaldo 😁
Martinus ada bakisah, jarnya handak napa haja lawan Ronaldo dibarinya tarus; handak hapi nang paling rarang ditukarakannya. Handak malihat urang main bal klub nang paling harat di kadudukan paling aksi, dijurungi tikitnya. Handak baanjangsana ka hujung banua hampai ka langit banganga, lambat bapadah haja. Pukuknya handak napa haja tinggal sambat, sutil banar.
Tagal sabuting jar Martinus nang kada dikabulakan Ronaldo, padahal nintu am nang paling dikapinginakannya. Martinus biasa bapadah handak minta masukakan ka akademi urang main bal nang paling bayik, inya handak banar jadi pamain bal nang profesional jarnya.
Kanapa jadi kada dibulihakan Ronaldo?
"Ikam kadada pondasinya Martinusai," ujar Ronaldo abahdahi. "Dasar-dasar gasan main bal haja ikam balum balajar, baluman lagi latihan fisik lawan asupan nutrisi, rekam medik, samanaham skill lawan sarabanya. Ikam talambat sudah Martinusai."
Padahal umuran Martinus pihan nintu hanyar 17-an tahun, pas sisigarannya, pas haharatannya.
Han, damintu sakalinya urang gasan mambina atlit, kada nang bajajatuan di bawah rambai pang, kada saitu saini. Urang dasar ada sakulahnya, ada paka-pakanya, ada latihan lawan ilmu sarabanya. Makanya atlit urang dasar harat, tahan apilan lawan ispiriguuut ....
Ulun biasa bapandiran lawan buhan kakanakan umur 20 tahunan. Inya atlit jarnya, pacang umpat Porprov Kalsel tahun di hadap, cabang bela diri nang tamasuk hanyar ada di Banua.
"Hau, di mana Pian balajar? Ada perguruannyakah sudah wadah kita?" jar ulun batakun. Sabab satahu ulun balum ada lagi perguruannya atanapi wadah latihannya di Banua pihan nintu.
"Ulun sudah pang umpat workshopnya," jarnya manyahuti.
"Astagaular!" jar ulun dalam hati. Ini cabang bela diri, pacang bahangkup, pacang bagapuk lawan basuntul bahabis, ajang proprov ha pulang. Kada gagampangan! Inya hanyar umpat workshop haja maka wani handak umpat ba-abar?
Maka porprov Kalsel parak banar jua sudah, wayahapa lagi inya latihan? Langsung balajar patikamannyanya hajakah? Kalu pinda barupuyan gigi atanapi baripahan batis banarai pahian batanding kaina. Gasan buhan palatih, diganang jua anak urang kalu pinda napa-napa. Mudahan jangan pang.
Pindanya kaya itu pang gambaran atlit kita di Banua, kada sabarataan jua pang. Hudah basisingut hanyat umpat latihan, hudah babulu ... (titik titik titik 🤭) hanyar mulai balajar. "Ikam talambat sudah," jar Ronaldo.
Sumber: https://www.facebook.com/1640861700/posts/10224030728229608/
0 Komentar:
Posting Komentar